Viðskiptavinir STEFs
STEF vonast til að þú komir til með að nota tónlist í starfsemi þinni. Tónlistin laðar að viðskiptavini og skapar skemmtilegt andrúmsloft. Sem viðskiptavinur hjá STEFi hefur þú frelsi til að nota tónlist í atvinnustarfsemi þinni.
Lítið mál er að gerast viðskiptavinur. Einungis þarf að fylla út í eyðublað og senda til STEFs. Eyðublaðið er hægt að fylla út hér á heimasíðunni og senda rafrænt. Einnig má senda útfyllt eyðublað á netfangið info@stef.is. Hafir þú einhverjar spurningar eða þurfir á að halda leiðbeiningum við útfyllingu eyðublaðsins er þú velkominn til að hafa samband við skrifstofu STEFs.
Þeir fjármunir sem þú reiðir af hendi sem viðskiptavinur skila sér síðan til þeirra sem hafa búið til tónlistina og textann, bæði erlendra og innlendra höfunda. Með greiðslu tryggir þú höfundum tónlistar og texta sanngjarna þóknun fyrir afnot af tónlist þeirra og stuðlar þannig að því að frekari nýsköpun.
Á grundvelli samstarfssamnings við SFH (Samband flytjenda og hljómplötuframleiðanda) fer hluti greiðslu viðskiptavina áfram til flytjenda og útgefenda tónlistar.
Jafnframt er vakin athygli á því að opinber tónflutningur án heimildar STEFs og SFH er brot á höfundalögum nr. 73/1972 og getur varðað skaðabótum og jafnvel refsingu.
Greiðslur vegna notkun tónlistar í atvinnurekstri eru frádráttarbær kostnaður eins og annar rekstrarkostnaður fyrirtækja og er greiðslurnar undanþegnar virðisaukaskatti skv. núgildandi lögum.
Hverjir eru viðskiptavinir STEFs?
Meðal viðskiptavina STEFs eru allar útvarps- og sjónvarpsstöðvar, veitingahús, samkomusalir, krár, hótel, kvikmyndahús, tónleikasalir, verslanir, hárgreiðslustofur, sólbaðsstofur o.fl. sem flytja tónlist opinberlega.
Er ég viðskiptavinur STEFs?
Ef þú notar tónlist til einhvers annars en að hlusta á hana heima hjá þér eða í bílnum þínum er mjög líklegt að þú teljist viðskiptavinur STEFs.
Hverjum á ég að greiða?
Ef þú stendur fyrir opinberum tónlistarflutningi á höfuðborgarsvæðinu eða í Eyjafjarðarsýslum og Þingeyjarsýslum snýrðu þér til skrifstofu STEFs og gengur frá leyfi fyrir flutningnum. Viðskiptavinir utan ofangreinds svæðis snúa sér til umboðsmanns, Gunnars Stefánssonar.
Hvað á ég að greiða mikið?
Gjaldskrá STEFs er margþætt, eftir því hvers konar starfsemi er um að ræða.
Hvenær á að greiða fyrir leyfið?
Ætlast er til að sótt sé um leyfi og greitt fyrir það fyrirfram.
