Afnot af verkum
Útvarp
Útvarpsstöðvar, hvort sem þær eru reknar til lengri eða skemmri tíma, þurfa leyfi frá STEFi til þess að útvarpa tónlist og greiða fyrir það. Í samningum STEFs og útvarps- og sjónvarpsstöðvanna er kveðið á um að þeim beri að veita STEFi upplýsingar um þá tónlist sem flutt er, hvort sem hún er innlend eða erlend. Samkvæmt samkomulagi sem viðurkennt hefur verið af alþjóðasamtökum höfundarréttarfélaga CISAC, sér sænska stefið, STIM, um að greiða til höfunda erlendrar tónlistar í samræmi við þær upplýsingar sem STEF lætur þeim í té og þann hluta af tekjum STEFs sem ætlaður er til greiðslu fyrir flutning á erlendum verkum.
Elsti viðskiptavinur STEFs er Ríkisútvarpið, og þar til á allra síðustu árum var RÚV einnig helsta heimild STEFs um afnot af tónlist. Með fjölgun útvarps- og sjónvarpsrása hefur þetta gjörbreyst.
Aðalúthlutanir STEFs byggjast á tónlistarskýrslum dagskrárgerðarfólks. Án tónlistarskýrslu er ekki hægt að skrá opinberan flutning verks og þannig verða rétthafar, höfundar eða erfingjar þeirra af réttmætum greiðslum. Tónverk sem birtist á tónlistarskýrslu þarf sömuleiðis að vera til í verkaskrá STEFs sem geymir nú um 46.000 innlenda titla. Höfundar bera sjálfir ábyrgð á að verk þeirra séu skráð. Tilkynning um nýtt verk.
Klukkutónlist er sú tónlist sem leikin er á milli dagskráratriði, oft án sérstakrar kynningar.
Í næstu aðalúthlutun STEFs í desember 2007, verður greitt fyrir opinberan flutning tónlistar á árinu 2006. Hjá STEFi var á árinu 2006 skráður tónlistarflutningur ársins 2005 eftir tónlistarskýrslum frá útvarps- og sjónvarpsstöðvum.
Í desember 2006 var reiknuð úthlutun fyrir spilun á 9.157 íslenskum verkum, sem leikin voru á árinu 2005. Með tölvukerfi sem tekið var í notkun við úthlutunina í fyrsta skipti í desember 2001 var gerð sú breyting að greiðslur undir þrjú þúsund krónum eru varðveittar í kerfinu, en ekki sendar út. Greiðslur voru sendar til rúmlega þrettán hundruð rétthafa, en annað fór í bið og verður greitt til einstakra rétthafa þegar uppsöfnuð fjárhæð nær kr. 3.000.
Úthlutun fyrir afnot af tónlist á hverri stöð tekur mið af þeim tekjum sem innheimtar voru á stöðinni, sbr. 3. grein Úthlutunarreglna STEFs.
Sjónvarp
Fyrir efni, sem sýnt er í sjónvarpi, sér STEF um að úthluta til íslenskra höfunda. STIM, systurfélag STEFs í Svíþjóð, sér um að úthluta til erlendra höfunda.
Til þess að hægt sé að úthluta fyrir tónlist í kvikmyndum og sjónvarpsþáttum, sem sýndir eru í sjónvarpi, þurfa að liggja fyrir s.k. "cue-sheet", það er sundurliðuð greinargerð um þá tónlist sem er að finna í myndinni, titla, höfunda o.s.frv.
ÁRÍÐANDI ER að þeir sem eiga efni, sem flutt er í sjónvarpi, gangi á eftir því við viðkomandi sjónvarpsstöð að skýrsla/skýrslur séu sendar til STEFs.
Fyrir tónlist sem flutt er í sjónvarpi er greitt tvöfalt það sem greitt er fyrir flutning í útvarpi, reknu af sama aðila, og er það gert í aðalúthlutun STEFs. Greitt er einfalt gjald fyrir kynningarstef og klukkutónlist í sjónvarpi.
Tónleikar
Tvenns konar úthlutanir eiga sér stað fyrir lifandi tónlistarflutning: Annars vegar eru greiðslur fyrir verk sem flutt eru af Sinfóníuhljómsveit Íslands á tónleikum sveitarinnar, s.k. konsertúthlutun, hins vegar verk flutt á öðrum tónleikum. Síðari tegund úthlutunar fer fram í s.k. aukaúthlutun og nær til þeirra sem eru félagar í Tónskáldafélagi Íslands og Félagi tónskálda og textahöfunda. Félögin tvö sjá um að úthluta til félaga sinna og hafa við það mismunandi aðferðir. T.Í. miðar við allar tiltækar upplýsingar um flutning verkanna, og eru þeim safnað á skrifstofu STEFs og unnið úr þeim þar, en F.T.T. kallar eftir upplýsingum frá félagsmönnum sínum. Á hverju ári er ákveðið hversu há fjárhæð á að renna til þessara úthlutana, og er þeirri fjárhæð deilt niður í samræmi við niðurstöður úthlutunarnefnda félaganna. Greiðslurnar eru sendar út með aðalúthlutun STEFs.
Upplýsingar um flutning á verkum erlendra höfunda hér á landi eru sendar sænska höfundaréttarfélaginu STIM, sem hefur tekið að sér að úthluta greiðslum frá STEFi til erlendra höfunda fyrir flutning á tónleikum þar sem höfundagjöld voru innheimt.
Kvikmyndir
Fylgst er með sýningum í kvikmyndahúsum og þær flokkaðar eftir því hve lengi þær eru sýndar, hve oft á dag og í hve stórum sal.
Kvikmyndahúsin greiða til STEFs ákveðinn hundraðshlut af seldum miðum. Stærsti hluti þeirra tekna er sendur til systurfélags STEFs í Svíþjóð, STIM, sem sér um að úthluta greiðslum til erlendra höfunda á grundvelli "cue-sheet" og upplýsinga frá STEFi um sýningar, enda er hlutur erlendra kvikmynda í íslenskum kvikmyndahúsum mun stærri en íslenskra.
Til þess að hægt sé að senda greiðslur til íslenskra höfunda tónlistar í kvikmynd sem sýnd er í kvikmyndahúsi, þarf að liggja fyrir cue-sheet. Á grundvelli þess og áætlaðs sýningarfjölda í húsunum er úthlutað til höfunda í aðalúthlutun STEFs.
Einhvern tíma mun STEF vonandi fá aðgang að nákvæmum upplýsingum um selda aðgöngumiða að hverri mynd í kvikmyndahúsunum, eins og tíðkast annars staðar, og eru þær þá notaðar sem reikningsgrunnur fyrir úthlutun til höfunda. Enn hafa samtök kvikmyndahúsaeigenda þó ekki ljáð máls á því.
Þegar gerð er íslensk kvikmynd (hvort sem um er að ræða leikna mynd eða þætti, heimildarmynd, auglýsingu eða hvers konar mynd með tónlist til sýninga í kvikmyndahúsum, sjónvarpi eða annars staðar) og ætlunin að nota tónlist sem ekki hefur verið sérstaklega samin fyrir tiltekna mynd, þarf að leita til STEFs/NCB á Íslandi sem sér um að útvega leyfið og innheimta, eða veitir upplýsingar um hvert á að snúa sér til að fá leyfið.
Kvikmyndir sem sýndar eru í sjónvarpi: Sjá sjónvarp.
Fyrir íslenska tónlist í kvikmyndum sem sýndar eru í kvikmyndahúsum er greitt með aðalúthlutun STEFs fyrir sýningar á myndum árið á undan, þ.e. í desember 2007 verður greitt fyrir myndir sem sýndar voru á árinu 2006.